For Filipino Readers Series #4

Ina sa Bawat Pahina

for Mother's Day

simula noong ako ay nasa sinapupunan mo pa lamang

hindi na mapinta ang sayang iyong naramdaman

sa bawat haplos at mahinang tapik mo sa iyong tiyan

nadarama ko rin ang kagalakan sa aking katawan

pagdating ng iyong nalalapit na kabuwanan

naghahanda na ang lahat sa darating na kapanganakan

sa aking kaarawan kamay mo'y hindi nila binitawan

hindi mo ininda ang sakit basta ako'y iyong masilayan

tinuruan mo akong maglakad nang dahan-dahan

sa bawat paghakbang, ako'y iyong sinabayan

paningin mo'y hindi lumihis para ako'y mabantayan

at sa wakas, humakbang mag-isa ay aking natutunan

kumanta, magsulat, sumayaw at magbilang

ilan lang yan sa mga bagay na aking kinamulatan

sa mga matatanda, bilin mo ako ay gumalang

kaya hanggang sa magkaisip, dala-dala ko kailanman

pagdating sa sekondarya pumili ako ng paaralan

pumayag ka kaya't ako'y napatalon sa kasiyahan

kahit alam mong malayo hindi mo ako pinigilan

kaya nabuo mong tiwala sa'kin, pangako hindi masasayang

pagkaraos ng ilang tao'y dumating sa kolehiyo

alam ko ang hirap mo kaya't ito'y pinagsikapan ko

tukso rito, tukso roon karamihan sa mga dinanas ko

ngunit mas nanaig sa'kin ang tiwala at pagmamahal mo

ngayon ako'y tapos na sa aking pag-aaral

dulot ito ng inyong sikap at labis na pagpapagal

maginhawang kinabukasan para inyo, sa isip ko ay pinairal

mas mahabang buhay ninyo, sa Panginoon din ay dasal

sa wakas ay natupad ko ang aking mga pangarap

salamat sa pagbibigay sa'kin ng maliwanag na hinaharap

tumulong ako sa inyo gaya ng aking ipinangako

kasiyahan sa bahay ay ramdam sa'ng sulok man mag-dako

sa pagkakataong ito ako ay mayroong nakilala

sa puso ko, siya ay labis na nagpapasaya

sa bawat ngiti niya ako'y nahahalina

kaya't pagdaan ng taon kami ay nagka-pamilya

hindi natagalan kami ay nagka-anak

bumili ng bagong bahay para sa aming mag-anak

kayo ay naiwan sa ating maliit na tahanan

wala akong narinig na reklamo dahil inyong naintindihan

naging masaya ka sa buhay na ako ay nagkaro'n

kaya ako'y nakuntento sa anong mayroon ako ngayon

sa malambot mong kama nahiga ako sa huling pagkakataon

ipinahinga ko ang aking katawan at yumakap sa iyo noon

pagkalipas ng ilang taon unti-unti ka nang humina

ramdam na ang mga sakit dulot ng pagkatanda

hindi ko pinansin ang iyong mga daing

dahil ako ay abala sa aking sariling mga hangarin

habang tumatagal lumalago ang aking buhay

hindi ko namalayan, kasabay pala iyon ng iyong pag-himlay

NAGISING AKO SA AKING MASAMANG PANAGINIP

NAPAMULAT AKO AT NIYAKAP KA NANG MAHIGPIT

PINAKALMA AKO NG HAPLOS MONG WALANG KAPANTAY

SALAMAT SA DIYOS, SA BUHAY MO INAY!

ISANG MASAMANG PANAGINIP NA SA AKIN AY NAGPAMULAT

NA KAILANMAN ANG PAG-IBIG MO SA AKIN AY TAPAT

MAGING MATAGUMPAY MAN AKO SA AKING SARILING BUHAY

HINDI DAPAT KALIMUTAN ANG DAKILA NATING NANAY

SALAMAT O INA SA MGA PANAHONG AKO'Y IYONG INALAGAAN

MGA PAGYAKAP MO SA AKIN TUWING AKO'Y NAHIHIRAPAN

SA PAGPAPATAWAD SA'KIN KAPAG AKO'Y NAGKUKULANG

PATULOY PA RIN ANG PAGTANGGAP MO SA'KIN MAGING AKO AY SINO MAN

KASAMA KITANG MAGLAKBAY SA MABILIS NA TAKBO NG BUHAY

HINDI MAN AKO PERPEKTO, ANDIYAN PA RIN ANG IYONG KAMAY

KAMAY NA HANDANG UMALALAY, SABI MO TAYO AY SABAY

KINAPITAN MO AKO NANG MAHIGPIT, BUHAY KO AY NAGKA-KULAY

PANSIN MO BA, INA? IKAW AY NANDIYAN SA BAWAT PAHINA

HINDI KA NAWALA PARANG IKAW LANG SA TUWINA

UMULAN MAN O UMARAW, KAHIT SAAN MAN MAGPUNTA

PAG-IBIG NA UMAAPAW, LABIS KONG NADARAMA

SA PAGKAKATAONG ITO, AKO AY NAIS NA BUMATI

DAHIL IKA'Y ISANG MAGITING NA ANAK NG HARI

BINIGAY KA NG DIYOS SA'MIN, IKA'Y MANANATILI

SALAMAT INA, 'YAN LANG ANG SAMBIT NG AKING MGA LABI

MANDARAYA ANG PANG-AKIT AT KUMUKUPAS ANG GANDA

NGUNIT ANG BABAING GUMAGALANG AT SUMUSUNOD KAY YAHWEH AY PARARANGALAN

MGA KAWIKAAN 31:30