For Filipino Readers Series #1

Hello! This is my first ever self-made "spoken" poetry. I already executed this in our church (United Church of Christ in the Philippines - Bailen) during our Youth's Night and it's theme is about loving, serving and following God.  May God touch your heart by this piece. All glory is His.

Nagmamahal, Naglilingkod, Sumusunod

Sa Juan kapitolo otso talatang labindalawa ay sinabi Mo (Juan 8:12):

"Ako ang ilaw ng sanlibutan. Ang sumusunod sa Akin ay hindi kailanman lalakad sa kadiliman, kundi magkakaroon ng ilaw ng buhay."

Ikaw, Ikaw na nagbibigay

ng kahulugan sa buhay

At ang kumakatawan ay kami

na Iyong laging inaakay

Sa Iyo, sa Iyo nagmula

ang liwanag ng sanlibutan

Na ngayon nga ay patuloy naming

hinahagkan at nararanasan

Ilaw na nagsisilbing

liwanag sa dati kong kadiliman

Hindi na ako maliligaw

ng landas kailanman

Ang ilaw ay lumiliwanag

sa kadiliman

At hindi nga magagapi

ng anumang kasamaan

Kaya't narito ako,

ako ay handa nang maglakbay

Dahil alam kong ako'y

may ilawang matibay

Walang ditong makasisira,

ni anumang matigas na bagay

Kaya ikaw na nakikinig ngayon, hinahamon kita,

halina't samahan mo ako

Sabay nating harapin

ang sanlibutang madilim

Ikalat at isaboy

ang ilawang nagbibigay-buhay

Maging liwanag sa mga nabubulag

at gumabay sa mga nakukulong

sa kadiliman

Ngayo'y may liwanag na tayo

Laliman naman natin ngayon

ang pagkakakilala

kung ano ba talaga ang halaga

ng mga salita Niya

Sa Juan kapitolo isa talatang isa hanggang dalawa ay sinabi Mo (Juan 1:1-2):

"Sa simula ay ang Salita, at ang Salita ay kasama ng Diyos, at ang Salita ay Diyos. Sa simula ay kasama na siya ng Diyos."

Mga salita Mo nga,

ang nagsisilbing gabay

sa araw-araw naming buhay

Nagtuturo ng mga bagay

na dapat naming panatilihin 

at gayundin isabuhay

Sinasabi Mo sa amin

kung ano ang dapat at hindi dapat

Kaya papuri

Sa'yo lamang ay nararapat

Salita Mo'y pananatilihin,

pagyayamanin at payayabungin

Dahil sa mga pangako Mo,

ako'y tumuloy at nagpapatuloy

Salamat!

Na kapag sinabi Mo

ay talagang gagawin Mo,

Pangakong galing Sa'yo

kailanman ay hindi napako

Sa'yo ako nagkaroon ng pag-asa

at ako'y patuloy na umaasa

Para sa susunod Mong

hinihintay naming pagbisita

Ako'y patuloy na naghihintay,

kasabay ng pananampalatayang may gawa

Kaya ikaw na nakikinig ngayon, hinahamon kita,

halina't samahan mo ako

Sabay nating harapin

ang sanlibutang madilim

Ikalat at isaboy

ang salitang nagbibigay-buhay

Maging isang kristiyanong

may pananampalatayang matibay

Ngayo'y may liwanag

at pagkakakilala

na tayong itinanim

Paghahandog ng sarili

ang huling bubuo

sa makabuluhang buhay

Sa Roma kapitolo dose talatang isa ay sinabi ng alagad Mo (Roma 12:1):

"Kaya nga, mga kapatid, isinasamo ko sa inyo, alang-alang sa mga kahabagan ng Diyos, na inyong ialay ang inyong mga katawan na isang handog na buhay, banal, na kasiya-siya sa Diyos, na siya ninyong makatuwirang paglilingkod."

Paghahandog ng buhay

ay isang matuwid na paglilingkod

Buhay na ibinigay Mo,

dapat gamitin lamang Sa'yo

Binigyan Mo ako

ng sapat na pangangailangan

Ngayon ay ibabalik ko

ng lagpas pa sa kinakailangan

Dahil Ikaw ay matapat,

ako ay dapat magtapat

Iaalay ko ang aking buhay

ng buong-buo

Na walang halong pag-iimbot

at paninibugho

Hindi lamang buong buhay

kundi iyong banal

at kalugod-lugod

Sapagkat sa paningin Mo,

hindi sapat ang buo lamang

ang banal lamang

at kasiya-siya lamang

Gusto Mo ay lahat,

sapagkat iyon ang nararapat

Kaya ikaw na nakikinig ngayon, hinahamon kita,

halina't samahan mo ako

Sabay nating harapin

ang sanlibutang madilim

Ikalat at isaboy

ang tamang paghahandog

paghahandog na nagbibigay-buhay

Isang abang lingkod

ngunit may buhay na makulay

Ngayo'y may liwanag

at pagkakakilala

na tayong itinanim

Gayundin ang tamang

pag-aalay ng sarili

Ikaw at ako,

sa tingin ko ay handa na

Halina't harapin

ang isang bagong buhay

Ang tunay na kahulugan

ng buhay

Buhay na para sa Kanya

at wala nang iba pa

Isang buhay na mayroong pagmamahal, pagsunod at paglilingkod.